మార్స్‌‌పై జర్నీ షురూ

• సక్సెస్​ఫుల్​గా పర్సివరెన్స్ టెస్ట్​ డ్రైవ్
• ఆరున్నర మీటర్లు ముందుకు వెళ్లిన రోవర్​
• 33 నిమిషాల పాటు సాగిన టెస్ట్​ డ్రైవ్​

లాస్​ఏంజిలిస్​: నాసా మార్స్​ రోవర్​ పర్సివరెన్స్​ తన జర్నీ మొదలుపెట్టేసింది. అంగారకుడిపై పరిశోధనలకు ముందు రోవర్​ టెస్ట్​ డ్రైవ్ ​కు వెళ్లింది. సక్సెస్ ​ఫుల్ ​గా ఆరున్నర మీటర్లు ముందుకు కదిలింది. 33 నిమిషాల పాటు సాగిన టెస్ట్​ డ్రైవ్ ​లో 4 మీటర్లు ముందుకు వెళ్లిన రోవర్​.. తర్వాత ఎడమవైపు 150 డిగ్రీలు తిరిగి మరో రెండున్నర మీటర్లు ప్రయాణించింది. టెస్ట్​ డ్రైవ్​ సందర్భంగా రోవర్​ చక్రాల అచ్చులు స్పష్టంగా కనిపించాయి. రోవర్​లోని ప్రతి వ్యవస్థను చెక్​ చేసేందుకుగానూ ఈ టెస్ట్​ డ్రైవ్ ​ను నిర్వహించినట్టు నాసా ప్రకటించింది. రోవర్​ను మార్స్ ​పైన దింపినప్పటి నుంచి ఇదే ఫస్ట్​ టెస్ట్​ డ్రైవ్​ అని నాసా జెట్ ​ప్రొపల్షన్​ లేబొరేటరీకి చెందిన ఇంజనీర్​ అనాయిస్​ జరీఫియన్​ చెప్పారు. టెస్ట్​ డ్రైవ్ లో రోవర్​ అన్ని విషయాల్లోనూ సక్సెస్​ అయిందన్నారు. రాబోయే రెండేళ్ల పాటు రోవర్  నిరాటంకంగా పనిచేస్తుందని ఈ డ్రైవ్ ​తో తేలిందన్నారు.

రోజూ 200 మీటర్లు

రోవర్​ ఆపరేషన్లు ప్రారంభించాక రోజూ 200 మీటర్ల పాటు ప్రయాణిస్తుందని నాసా చెబుతోంది. పరిశోధనల్లో భాగంగా గతంలో అక్కడ జీవరాశి మూలాలను రోవర్​ తెలుసుకుంటుందని పేర్కొంది. అంగారకుడిపై గత వాతావరణంతో పాటు గ్రహానికి సంబంధించిన నేల వివరాలను సేకరిస్తుందని తెలిపింది. ఇక, దిగిన కొద్ది రోజులకే మార్స్​ ఫొటోలను పర్సివరెన్స్​ పంపించినట్టు వెల్లడించింది. రోవర్​ తీసిన ఫొటోలను యూరోపియన్​ స్పేస్​ ఏజెన్సీకి చెందిన ట్రేస్​ గ్యాస్​ ఆర్బిటర్​, నాసా మావెన్ ద్వారా ఆ ఫొటోలను భూమికి పంపించిందని తెలిపింది.